上一篇blog講完，點解還是物理防曬最安全有效。今篇就同大家介紹下Tag Concept 嘅物理防曬產品啦！
- 防曬最緊要係咩？
唔好令我曬黑！唔好令我曬傷！唔好令我曬老！
未講完，最好搽完氣息好啲，膚色有光澤咗！
最好可以幫我殺死自由基，保護我啲膠原BB（好珍貴㗎嘛）！
最好唔會焗到生粒粒，仲可以對本身啲暗粒暗瘡有消炎作用！
最好我敏感緊嘅時都可以用！
最好大肚／餵人奶／備孕期間都可以放心使用，唔使花時間再搵轉用邊款！
雖然Tag Concept 嘅防曬產品唔多，但我哋上架嘅防曬都可以滿足到以上要求！
- Zinc oxide 氧化鋅
直至今時今日，Zinc oxide 氧化鋅仍然係物理性防曬入面嘅大佬，佢係唯一最全面抵擋 UVA及UVB 長短波嘅防曬成分，温和安全無刺激性。氧化鋅來自天然礦物紅鋅礦，以將紫外線反射嘅原理達致防曬效果。同時佢亦具有抗炎性、修復性，可以加速傷口癒合，對敏感皮膚嚟講非常友好，好多BB 嘅pat pat膏入面都有添加氧化鋅入去，連BB 嬌嫰嘅皮膚都可以使用，其温和程度可想而知。
Tag Concept 現時有兩個品牌嘅防曬：Josh Rosebrook & Odacite!
Josh 好強調佢嘅品牌用嘅氧化鋅係微米化(非納米)、無塗層嘅氧化鋅。
Odacite 嘅創辦人VALÉRIE 亦非常強調佢嘅防曬不含有機矽、香料或納米粒子（”without silicones, fragrances or nanoparticles”）
其實點解要強調使用非納米、無塗層，不含有機矽的氧化鋅？
- 非納米氧化鋅(Non-nano Zinc) VS 納米氧化鋅(Nano Zinc) 皮膚吸收被納米化嘅氧化鋅後，有可能進入血液，從而對人體健康構成威脅。
但亦有唔少科學論文聲稱納米氧化鋅唔會被皮膚吸收，唔會進入血液，除非係以噴霧或粉末嘅形式直接吸入納米氧化鋅 ，否則不會對人體健康構成威脅。呢一點雖然未有定論，但可以肯定嘅，係納米氧化鋅同化學防曬一樣對海洋生物具有破壞性影響。納米氧化鋅懸浮於水中，會影響海洋溫度、鹽度及PH值，沉積喺沉積物中，進入食物鏈，滲入微型浮游生物並對海洋生態產生破壞。因此，出於安全考量及保護海洋生態嘅角度，微米化(非納米)嘅氧化鋅先係更好嘅選擇。 - 無塗層鋅(Uncoated Zinc) VS 塗層鋅(Coated Zinc)
用有機矽(Silicons)包覆住嘅氧化鋅，就係塗層鋅(Coated Zinc)。有好多時都聽到有人話唔好妖魔化Silicons，的確，某程度上，對某啲皮膚嚟講，佢可能仲會對皮膚有好處。事實上Silicons 有機矽常見於各大品牌化妝品、防曬，甚至係護膚品之中，並常以Dimethicone 形式出現。有機矽實為人工合成物，由於能使產品易於塗抹，輕鬆填補臉上毛孔，細紋及皺紋，產生良好使用感，因而被廣泛應用，至今亦冇相關法例去規管呢個成份，咁即係佢其實對人體係安全。咁等我哋盡量中肯地去睇成件事，加入咗Dimethicone 嘅產品，對非常乾燥膚質嚟講，的確可能喺皮膚上形成一層保護膜，防止皮膚表皮水分散失（TEWL：Transepidermal Water Loss）。但對於混合皮膚／油性皮膚／有口罩肌人土嚟講，呢一層就係不透氣密封膜，影響皮膚正常排毒排汗功能，更有機會助長油脂，雜質及細菌積聚，誘發更嚴重嘅封閉性粉刺、發炎暗瘡。咁我哋就當然會推薦無塗層嘅氧化鋅防曬，透氣度高，唔會為皮膚造成額外負擔。
乾燥肌膚係咪又代表從此可以使用有矽嘅產品呢？呢個就交由大家自行選擇啦！我哋之前有一篇blog 介紹過幾款護膚精華油，含有大量豐富嘅不飽和脂肪酸，幫你養返靚皮膚屏障，重新build up 同train 返一個健康嘅吸水鎖水狀態。大家不妨諗諗點解要捨棄咁高質素又可以enjoy 埋其他護膚benefits 嘅天然植物油，反而用人工合作成矽去做鎖水呢?（咁樣亦係治標不治本呀！）
- 以下同大家講下Josh Rosebrook 嘅防曬日霜先啦
含有12% Zinc Oxide 氧化鋅，有效抵抗UVA+UVB。月見草籽油，琉璃苣籽油，大麻籽油等草本植物油，含有豐富多元不飽和脂肪酸，可用於改善過敏性皮膚炎、濕疹。成個配方具有高效抗炎、鎮靜舒緩及修復功效，特別適合油性、混合性、粉刺暗瘡及敏感皮膚使用。所以佢係可以消炎，唔會焗到生粒粒，亦唔會對已有嘅暗粒暗瘡造成負擔，即使敏感緊嘅時都可以用㗎！呢個產品分別有 [無色]($460) 同 [有色]($480) 兩個選擇，[無色]同[有色]嘅配方係一模一樣的。
想搽完亮白少少（真係少少，唔係死白），可以揀[無色]。
至於[有色]只係加入咗Mica /Iron Oxid 雲母 /氧化鐵去添加顏色，適合本身膚色tan 少少嘅人使用，亦都因為Mica /Iron Oxides 有少少折射作用，所以Josh 都話會有少少natural glow 嘅效果。我哋聽過好多客人不約而同表示[有色]嘅控油效果係比較好，我哋估計可能Mica /Iron Oxides 具控油特性（好多控油定妝powder 都會使用)，所以就會有呢個效果。喺度提下大家，唔好以為[有色]就有調色效果，放假用佢就可以偽素顏，佢個遮瑕／收毛孔／潤色／調色效係零的，唔好有咩幻想，都唔好有咩誤會。 - 接住落嚟係Odacite嘅 SPF 50 Mineral Drops Sheer Sunscreen 透亮礦物防曬霜30ml($420)
含有12% Zinc Oxide 氧化鋅，有效抵抗UVA+UVB。SPF50 PA++++，睇返成份，有綠茶 ，角鯊烷就知道個抗氧力好高，幫助抵擋自由基，咁就可以保護到我哋嘅膠原BB，達致抗衰老效果！沒藥醇，洋金菊，金盞花可以抗炎，舒緩並改善肌膚敏感乾燥等問題。仲有一個威威成份：菸鹼胺 ，即係維他命B3！研究證實將B3塗抹喺皮膚上，可以幫助重建肌膚屏障，達到對抗外界刺激、強化保濕能力、避免水分流失、修復肌膚損
傷等等效果。 B3仲可阻斷黑色素傳遞，進而抑制黑色素生成，長期使用能達至美白及淡斑效果 。 一支防曬可以有埋護膚功效，搽完仲自帶自然bling bling 亮膚效果，所以一上架好多客人試完上手都帶咗佢返屋企啦！但大家唔好以為SPF50 高過Josh Rosebrook Day Cream SPF30，就話高好多我要轉用呢一支呀，其實SPF30可以阻擋96.67%紫外線，SPF50可以阻擋98%紫外線，日常返工放工使用下，SPF30 同SPF50 幾乎無區別㗎。
後記：
上年我大肚嘅時候，我老公話聽好多同事講大肚容易出斑，佢就(懶)係好貼心咁買咗支比卡超特別版AXXXXX防曬（早幾年賣廣告賣到鋪天蓋地嗰個日本牌子)同一把自私的遮俾我，叫我要日日搽防曬同擔遮。
跟住我一search，先知原來佢係一支又有化學活性成份又有物理活性成份嘅防曬，但係佢用嘅某啲化學防曬劑唔係我哋成日喺FDA 見到嘅化學防曬劑，原來嗰啲化學防曬劑係FDA 禁止使用，不過日本澳洲等國家都可以使用，但就要限制住個percentage。
咁第一次大肚，梗係緊張過人㗎啦，仲要我做天然護膚品呢行，我就梗係唔會用支AXXXXX防曬啦，放係屋企得個擺字。點知我老公死心不息，覺得我唔領佢情，之後做產檢嘅時候，佢主動問婦產科醫生可唔可以用化學防曬…
我好驚！因為我記得醫生嗰日心情好似麻麻哋，講嘢都無乜尾音，佢仲係呢啲時候問啲咁嘅問題… 醫生當時聽完停咗一停，串串哋講：你會問得都係知道唔好㗎啦，點解明知有咗BB 仲要用Chemical sunscrrrreen? (accent好好聽R音重得嚟又唔浮誇) (錯重點)
當時我未驚完，但見到我老公俾醫生窒到咁應，無嘢反駁到，我都有少少心痛佢嘅，話哂佢都係一片好心想我好，只係無做足功課，同埋唔細心囉，點會唔知我用開josh 防曬，仲要已經用咗好多支空瓶。
好啦各位準媽媽/媽媽，既然婦產科醫生都話：你會問得都係知道唔好㗎啦，點解明知有咗BB仲要用Chemical sunscrrrreen? 大家都係揀返上面同大家推薦嘅Physical sunscrrrreen啦~
今次講到呢度啦，下次再講其他topic!
From: 丁丁
